سندھ میں عام انتخابات کے لئے قائم انیس ہزار ، آٹھ پولنگ اسٹیشنز میں سے چھ ہزار سے زائد انتہائی حساس قرار۔

عرفان علی

18:58 2024, 6 February

ہر انتہائی حساس پولنگ اسٹیشن پر سات پولیس اہلکار تعینات ہوں گے۔

پولنگ اسٹیشنز پر فوجی جوانوں کی تعیناتی بھی مکمل۔ ایپکس کمیٹی اجلاس میں وزیراعلی سندھ کو آگاہی۔

آئی جی نے بتایا کہ دوہزار تیئس میں گزشتہ سال کی نسبت موبائل فون، موٹرسائیکل اور گاڑیاں چوری اور چھینے کی وارداتوں میں چار فیصد سے زائد کمی ہوئی۔

نگراں وزیراعلیٰ سندھ جسٹس (ر) مقبول باقر کی کی زیر صدارت صوبائی ایپکس کمیٹی کا تیسواں اجلاس ہوا۔

صوبائی وزرا، چیف سیکریٹری سندھ ،کورکمانڈر کراچی لیفٹننٹ جنرل بابر افتخار ، ڈی جی رینجرز میجر جنرل اظہر وقاص، آئی جی پولیس رفعت مختار، حساس اداروں کے نمائندے بھی شریک ہوئے۔ آئی جی سندھ نے بتایاصوبہ میں انیس ہزار، آٹھ پولنگ اسٹیشنز قائم کئے گئے ہیں۔

ان میں سے چھ ہزار، پانچ سو پچاس حساس اور چھ ہزار، آٹھ سو ایک انتہائی حساس ہیں۔ نارمل پولنگ اسٹیشن میں چار پولیس اہلکار، حساس پر پانچ اور انتہائی حساس پر سات پولیس اہلکار فرائض انجام دیں گے۔

کور کمانڈر کراچی لیفٹیننٹ جنرل بابر افتخار نے شرکا کو بریف کیا کہ فوجی جوان اور افسر اپنی ڈیوٹی کے علاقوں میں پہنچ چکے ہیں۔

آرمی کی پولنگ اسٹیشنز پر تعیناتی مکمل ہوگئی۔ امن و امان پر آئی جی سندھ نے بتایا دوہزار تیئس میں چھیاسی ہزار، چھ سو چھیاسی موبائل فون، موٹرسائیکلیں، گاڑیاں چوری اور چھینی گئیں،، جو دوہزار بائیس کے مقابلے میں چار اعشاریہ ایک فیصد کم تھیں۔

یکم جنوری دوہزار تیئس سے اگست تک سات سو سینتیس پولیس مقابلوں میں ایک سو آٹھ اسٹریٹ کرمنلز ہلاک اور آٹھ سو نواسی زخمی ہوئے۔ تیرہ ڈاکو ہلاک جبکہ پانچ ہزار، دوسو چھبیس ڈاکو گرفتار ہوئے۔

اسی عرصہ میں تین ہزار ، چارسو مختلف اقسام کا اسلحہ پکڑا اور سترہ ہزار کلو گرام سے زائد منشیات پکڑی گئی۔

اغوا برائے تاوان کے ایک سو ستر مقدمات درج ہوئے،، جن میں تمام افراد بازیاب کرائے گئے۔

ابھی چار افراد کو بازیاب کرانا ہے۔

وزیراعلی سندھ کا کہنا تھا اسٹریٹ کرائم ہر صورت میں کنٹرول ہونے چاہیں۔

اسٹریٹ کرائم کے سماجی محرکات حکومت ٹھیک کرے گی لیکن پولیسنگ بہتر ہونی چاہئے۔