نوجوانوں کا اشتراک: امن و استحکام کی راہ پر گامزن
چہرہ ڈیسک
نوجوانوں کا اشتراک: امن و استحکام کی راہ پر گامزن
الوینہ شاہد
کراچی میں امن و تعلیم کے زیرِ اہتمام ایک اہم ورکشاپ منعقد کی گئی جس کا مقصد نوجوانوں کو امن کے فروغ میں شامل کرنا تھا۔ جامعہ کراچی میں منعقدہ اس پروگرام میں سندھ اور بلوچستان کے مختلف اضلاع سے تعلق رکھنے والے افراد نے شرکت کی، جن میں مذہبی اسکالرز، صحافی، سیاسی کارکنان، ٹرانس جینڈرز اور تعلیمی شعبے سے وابستہ شخصیات شامل تھیں۔
یہ تین روزہ تربیتی ورکشاپ یورپی یونین، اقوام متحدہ کے دفتر برائے منشیات و جرائم اور نیشنل کاؤنٹر ٹیررزم اتھارٹی کے اشتراک سے منعقد کی گئی۔ مقررین نے نوجوانوں کے کردار پر روشنی ڈالی، خاص طور پر انتہا پسند نظریات کے خاتمے اور معاشرتی استحکام کے فروغ کے حوالے سے۔ شرکاء نے گروہی سرگرمیوں میں حصہ لیا اور اپنے تجربات و خیالات کا تبادلہ کرتے ہوئے اپنی کمیونٹیز کو درپیش مسائل پر بات کی۔
ورکشاپ کے منتظمین کا کہنا تھا کہ اس کا بنیادی مقصد تشدد اور انتہا پسندی کے خلاف عملی اقدامات کی حوصلہ افزائی کرنا ہے۔ تقریب کے اختتام پر شرکاء میں تعریفی اسناد تقسیم کی گئیں، جو ان کی شمولیت اور کردار کی علامت تھیں۔
یہ ورکشاپ نوجوانوں کو عملی طور پر شامل کرنے کی ایک مثبت کوشش تھی، جو مستقبل میں مزید استحکام اور ترقی کی راہ ہموار کر سکتی ہے۔
